ព្រះវិហារ៖ នៅព្រឹកថ្ងៃទី១៧ ខែមីនា ឆ្នាំ២០២៥ ស្ថិតនៅមន្ទីរវប្បធម៌ និងវិចិត្រសិល្បៈខេត្តព្រះវិហារ បានរៀបចំពិធីអបអរសាទរ ទិវាវប្បធម៌ជាតិ ៣មីនា លើកទី២៧ ឆ្នាំ២០២៥ ក្រោមប្រធានបទ “យុវជនដើម្បីវប្បធម៌ជាតិ” ដោយបានប្រព្រឹត្តិទៅក្រោមអធិបតីភាព លោក សុខ សាន្តតារ៉ា អភិបាលរងខេត្តព្រះវិហារ និងមានការចូលរួមពីសំណាក់ លោក លោកស្រី ប្រធាន/អនុប្រធាន មន្ទីរអង្គភាពជុំវិញខេត្ត មេបញ្ជាការកងកម្លាំងទាំង៣ ថ្នាក់ដឹកនាំ និងមន្រ្តីរាជការនៃមន្ទីរវប្បធម៌ និងវិចិត្រសិល្បៈខេត្ត យុវជន ស.ស.យ.ក ព្រមទាំងសិស្សានុសិស្សជាច្រើនរូបទៀត។ ពិធីប្រព្រិត្តទៅក្នុងគោលបំណងរំឭកដល់គុណូបការៈបុព្វបុរសខ្មែរគ្រប់ជំនាន់ ដែលបានលះបង់ទាំងកម្លាំងកាយ កម្លាំងចិត្ត និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបានបន្សល់ទុកមកដល់កូនចៅជំនាន់ក្រោយ។ លើកឡើងក្នុងឱកាសនោះ លោក នៅ ចាន់គង់ ប្រធានមន្ទីរវប្បធម៌និងវិចិត្រសិល្បៈខេត្តព្រះវិហារបានអោយដឹងថា រាជរដ្ឋាភិបាលកម្ពុជាសម្រេចរៀបចំទិវាវប្បធម៌ជាតិ ៣មីនា លើកទី២៧ ឆ្នាំ២០២៥ ដោយបន្តរក្សាប្រធានបទ “យុវជនដើម្បីវប្បធម៌ជាតិ” ក្នុងគោលបំណងជំរុញឲ្យប្រជាជនខ្មែរទាំងក្នុង និងក្រៅប្រទេស ជាពិសេសយុវជន ដែលជាអ្នកបន្តវេន បានចូលរួមសកម្មភាពអភិរក្ស លើកស្ទួយ និងអភិវឌ្ឍន៍វប្បធម៌ជាតិ។ អាស្រ័យហេតុនេះដើម្បីអោយស្របតាមគោលនយោបាយរបស់ រាជរដ្ឋាភិបាល ក្នុងឆ្នាំ២០២៤ កន្លងទៅនេះមន្ទីរវប្បធម៌ និងវិចិត្រសិល្បៈខេត្តព្រះវិហារ ដែលជាសេនាធិការឲ្យក្រសួងវប្ប ធម៌ និងវិចិត្រសិល្បៈ បានយកចិត្តទុកដាក់ក្នុងការបង្កើនប្រសិទ្ធភាពការងារ តាមរយៈការពង្រឹងវិន័យ ការអភិវឌ្ឍសមត្ថភាព មន្ត្រីរាជការ និងរៀបចំសណ្តាប់ធ្នាប់ បន្តបេសកកម្ម អភិរក្ស លើកស្ទួយ និងអភិវឌ្ឍន៍វប្បធម៌ជាតិ។
មានប្រសាសន៍ក្នុងឱកាស លោក សុខ សាន្តតារ៉ា បានថ្លែងថាកម្មវិធីនាថ្ងៃនេះពិតជាមានអត្ថន័យ និងខ្លឹមសារយ៉ាងជ្រាលជ្រៅ ព្រោះជាថ្ងៃប្រារព្ធទិវាវប្បធម៌ជាតិ សម្រាប់ប្រជាជនកម្ពុជា ក៏ដូច ជាប្រជាពលរដ្ឋនៅក្នុងខេត្តព្រះវិហារទាំងមូល។ លោកក៏បាន សម្តែងនូវការកោតសរសើរដ៏ស្មោះ និងសូម វាយតម្លៃខ្ពស់ចំពោះការយកចិត្តទុកដាក់ កិច្ចខិតខំប្រឹងប្រែងប្រកបដោយឆន្ទៈមោះមុត របស់មន្ត្រីរាជការនៃមន្ទីរវប្បធម៌ និងវិចិត្រសិល្បៈខេត្ត ទាំងអស់ ដែលបានចុះស្រាវជ្រាវ សិក្សាចងក្រង ការពារអភិរក្សនូវសម្បត្តិបេតិកភណ្ឌរូបី និងអរូបី ក្នុងមូលដ្ឋានខេត្តព្រះវិហារក្នុងការបង្កើតនូវស្នាដៃសិល្បៈថ្មីៗ ដោយឈរលើមូលដ្ឋានខឿនមរតកវប្បធម៌ជាតិក្នុងតំបន់ ដើម្បីចូលរួមផ្សព្វផ្សាយអោយបានទូលំទូលាយជារៀងរាល់ឆ្នាំ។ ជាពិសេសក៏មិនភ្លេចនោះដែរ នូវការលះបង់អស់កម្លាំង កាយចិត្តរបស់ កងកម្លាំងទាំងបីប្រភេទ អាជ្ញាធរមូលដ្ឋានគ្រប់ជាន់ថ្នាក់ក្នុងខេត្តព្រះវិហារ ក្នុងកិច្ចចូលរួមសហការអនុវត្ត គោលនយោបាយជាតិលើវិស័យវប្បធម៌ របស់រាជរដ្ឋាភិបាលដើម្បីអភិរក្ស និងអភិវឌ្ឍន៍ជាតិ ក្នុងគោលដៅប្រែក្លាយ ព្រះរាជាណាចក្រកម្ពុជា ក្លាយជាមជ្ឈមណ្ឌលផ្សព្វផ្សាយអរិយធម៌ជាតិខ្មែរ។ឆ្លៀតក្នុងឱកាសនេះ លោក ក៏បានស្នើរឲ្យមន្ទីរវប្បធម៌ និងវិចិត្រសិល្បៈ ខេត្តព្រះវិហារ បន្តកិច្ចខិតខំប្រឹងប្រែងកន្លងមកឲ្យកាន់តែមានប្រសិទ្ធភាពខ្ពស់ ដោយ បន្តជំរុញកិច្ចសិក្សាស្រាវជ្រាវរុករកស្ថានីយបុរាណ ដែលពុំទាន់បានចុះបញ្ជីរសារពើភណ្ឌដែលនៅសេសសល់ តាមទីដាច់ស្រយាល ក្នុងខេត្ត។បន្តសកម្មភាពចុះវាស់វែងគូសគំនូសប្លង់ សាលកប័ត្រកាន់កាប់ តាមទីទួល ស្រះ ត្រពាំង ស្ពាន និងប្រាសាទនានា នៅក្នុងខេត្ត ដើម្បីធ្វើប្លង់កម្មសិទ្ធិ។បន្តកិច្ចសិក្សាស្រាវជ្រាវរុករកចុះបញ្ជីរសារពើភណ្ឌ សមុច្ច័យ វត្ថុសិល្បៈបុរាណ នៅក្នុងនិងក្រៅឃ្លាំង និងតាមទីវត្ត អារាម។បន្តកិច្ចសិក្សាស្រាវជ្រាវរុករកចុះបញ្ជីរមរតកវប្បធម៌អរូបី ជាអាទ៍ ទំនៀមទម្លាប់ ប្រពៃណី របាំបុរាណ និងសិល្បៈហត្ថ កម្មជាដើម។បន្តពង្រីកកិច្ចសហប្រតិបត្តការណ៍ ជាមួយកម្លាំងទាំងបីប្រភេទ និងអាជ្ញាធរមានសមត្ថកិច្ចក្នុងការទប់ស្កាត់ បទល្មើសបេតិកភណ្ឌ។និងបន្តពង្រឹងកិច្ចសហការណ៍ជាមួយមន្ទីររៀបចំដែនដី នគររូបនីយកម្ម សំណង់ និងសូរិយោដី ព្រមទាំងអាជ្ញាធរក្រុងស្រុក ឃុំសង្កាត់ លើការងារចុះកំណត់ព្រំដែនតំបន់ការពារស្ថានីយបុរាណដ្ឋាន ដើម្បីធ្វើប្លង់កម្មសិទ្ធិ ជៀសវាងការទន្ទ្រានពីសំណាក់ប្រជាពលរដ្ឋដោយកត្តាណាមួយ៕
