ព្រះវិហារ/នារសៀលថ្ងៃទី១៤ ខែមីនា ឆ្នាំ២០២៥ នៅទីបញ្ជាការដ្ឋាន តំបន់ប្រតិបត្តិការសឹងរងព្រះវិហារ ឯកឧត្ដម ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវាក្រសួងការពារជាតិ និងជាប្រធានអនុគណៈកម្មការគោលនយោបាយយោធិន ,ពលី ,មរណៈ ,បង្កស្លាប់ ,បាត់ខ្លួន ,ពិការ និងសោធននិវត្តន៍ បានដឹកនាំក្រុមការងារ បើកប្រាក់គោលនយោបាយ ជូនយោធិនចូលសោធននិវត្តន៍ ចេញពីជួរ ដល់យោធិនអង្គភាព តំបន់ប្រតិបត្តិការសឹងរងព្រះវិហារ ដែលត្រូវបានផ្ទេរចេញពីក្របខ័ណ្ឌក្រសួងការពារជាតិ ដែលមានការចូលរួមទទួលស្វាគមន៍ដោយ ឯកឧត្ដម ឧត្តមសេនីយ៍ទោ ច័ន្ទ សុភ័ក្ដ្រា មេបញ្ជាការតំបន់ប្រតិបត្តិការសឹងរងព្រះវិហារ ។
ថ្លែងក្នុងពិធីនេះ ឯកឧត្ដម ឧត្តមសេនីយ៍ទោ មេបញ្ជាការតំបន់ប្រតិបត្តិការសឹងរងព្រះវិហារ បានមានមតិផ្តាំផ្ញេីរដល់ យោធិនទាំងអស់ ដែលបានចូលសោធននិវត្តន៍ ចំនួន ៤៥រូប នៅពេលបានបើកប្រាក់គោលរបបបានហើយ សូមបងប្អូនយកទៅប្រើប្រាស់អោយមានប្រយោជន៍ និងបង្កើនជីវភាពគ្រួសារឱ្យមានភាពរីកចម្រើន និងផ្គត់ផ្គង់ដល់ការសិក្សារបស់កូនៗ ដើម្បីបន្តវេនរួមគ្នាកសាងអភិវឌ្ឍប្រទេស ។
ឯកឧត្តម ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវាក្រសួងការពារជាតិ បានពន្យល់អំពីច្បាប់ និងគោលរបប នីតិវិធីក្នុងការបើកប្រាក់ ដោយអនុវត្តតាម អនុក្រឹត្យ និងសារាចរណែនាំអន្តរក្រសួង ស្ដីពីរបបគោលនយោបាយ ចំពោះយោធិនសោធននិវត្តន៍ ចេញពីជួរ៕
