(កណ្តាល)៖ ឯកឧត្តម ស៊ុន ចាន់ដារ៉ា អនុប្រធានក្រុមការងារគណបក្ស ចុះជួយមូលដ្ឋានឃុំព្រះពុទ្ធ ស្រុកកណ្ដាលស្ទឹង ខេត្តកណ្ដាល តំណាង ឯកឧត្តម ជីម សុខ ប្រធានក្រុមការងារគណបក្សចុះ មូលដ្ឋានឃុំព្រះពុទ្ធ រួមនិងថ្នាក់ដឹកនាំក្រុមការងារចុះមូលដ្ឋាន ជាច្រើនរូប កាលពីព្រឹកថ្ងៃទី០៩ ខែមិនា ឆ្នាំ២០២៥នេះ បានចុះជួបសំណេះសំណាលជាមួយបងប្អូនប្រជាពលរដ្ឋ សមាជិក សមាជិការជាប្រធានក្រុមបក្សជានារី ជាង ២០០ នាក់ក្នុងមូលដ្ឋានភូមិទាំង ៥ របស់ឃុំព្រះពុទ្ធ ស្រុកកណ្ដាលស្ទឹង ខេត្តកណ្ដាល ក្នុងឱកាសដែលប្រជាពលរដ្ឋនៅទូទាំងសាកលលោក ពិសេសព្រះរាជាណាចក្រកម្ពុជាកំពុងចូលរួមអបអរសាទរខួបលើកទី១១៤ ទិវានារីអន្តរជាតិ ៨ មីនា ឆ្នាំ ២០២៥ ។ ក្នុងឱកាសចុះជួបសំណេះសំណាលនោះ ឯកឧត្តម ស៊ុន ចាន់ដារ៉ា ក្នុងនាមឯកឧត្តម ជឹម សុខ សមាជិកគណៈកម្មាធិការកណ្ដាលគណបក្សប្រជាជនកម្ពុជា ប្រធានក្រុមការងារចុះជួយមូលដ្ឋានឃុំព្រះពុទ្ធ ឯកឧត្តម បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងបំពេញការងារបម្រើប្រជាពលរដ្ឋ របស់ប្រធានក្រុមបក្ស និងមន្រ្តីគណបក្សគ្រប់ថ្នាក់ ពិសេសសមាជិកក្រុមការងារចុះជួយមូលដ្ឋានឃុំ ដែលរហូតមកបានខិតខំប្រឹងប្រែងយកអស់កម្លាំងកាយចិត្ត ស្មារតី និងធនធានផ្ទាល់ខ្លួន បម្រើប្រជាពលរដ្ឋសម្រេចបានសមិទ្ធផលគួរជាទីមោទនៈ ។ ឯកឧត្តម ស៊ុន ចាន់ដារ៉ា បានលើឡើងថា អង្គសន្និបាតគណៈកម្មាធិការកណ្តាលលើកទី៤៥ អាណត្តិទី ៥ របស់គណបក្សប្រជាជនកម្ពុជា កាលពីពេលកន្លងទៅបានវាយតម្លៃចំពោះដំណើរការនៃការកែទម្រង់និងការពង្រឹងអភិបាលកិច្ច ស្របតាមអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” ។ ជាពិសេស តាមរយៈការអនុវត្តវិធានការគន្លឹះទាំង ៥ បានធ្វើឱ្យមានវឌ្ឍនភាពគួរឱ្យកត់សម្គាល់ក្នុងការកសាងរដ្ឋបាលសាធារណៈប្រកបដោយសមត្ថភាព និងភាពស្អាតស្អំ, ការកសាងធនធានមនុស្សប្រកបដោយចំណេះដឹង ចំណេះធ្វើ គុណធម៌ និងកាយសម្បទា, ការពង្រីកវិសាលភាព និងប្រសិទ្ធភាពនៃប្រព័ន្ធគាំពារសង្គម, ការបង្កើតការងារ និងជំរុញផលិតកម្ម ព្រមទាំងការពង្រឹងសន្តិសុខ សុវត្ថិភាព និងយុត្តិធម៌សង្គម ។ ឯកឧត្តម ស៊ុន ចាន់ដារ៉ា បានគូសបញ្ជាក់ផងដែរអំពីការដាក់ចេញទិសដៅរបស់សន្និបាតឆ្នាំ២០២៥ ក្នុងការពង្រឹងធ្លុងមហាសាមគ្គីជាតិ ក្រោមដំបូលរដ្ឋធម្មនុញ ការពាររឹងមាំឯករាជ្យ អធិបតេយ្យ និងបូរណភាពទឹកដីកម្ពុជា ការពារដាច់ខាត សុខសន្តិភាព ស្ថិរភាពនយោបាយ និងសន្តិសុខជាតិ មិនឲ្យកម្លាំងអមិត្ត ឬក្រុមជ្រុលនិយមណាមកបំផ្លាញការអភិវឌ្ឍ និងសេចក្តីសុខសាន្តរបស់ប្រជាជនបានឡើយ ។ ឯកឧត្តម ស៊ុន ចាន់ដារ៉ា បានធ្វើការផ្តាំផ្ញើដល់ ប្រធានក្រុមបក្សមកពីភូមិទាំង ៥ របស់ឃុំព្រះពុទ្ធ និងក្រុមការងារថ្នាក់កណ្ដាលចុះជួយមូលដ្ឋានឃុំ ឲ្យយកចិត្តទុកដាក់បង្កើន និងពង្រឹងសមាជិកគណបក្សចាស់ និងថ្មី ទាំងបរិមាណ គុណភាព ដោយឈរលើគោលការណ៍សាមគ្គីឯកភាពផ្ទៃក្នុង និងកិច្ចសហប្រតិបត្តិការល្អ ជាពិសេសបន្ត ការកសាង អភិវឌ្ឍន៍មាតុភូមិកម្ពុជា ។ ដោយឡែកសម្រាប់មន្ត្រីក្រុមការងារចុះពង្រឹងគណបក្សមូលដ្ឋាន ឯកឧត្តម ស៊ុន ចាន់ដារ៉ា ក៏បានផ្ដល់ការលើកទឹកចិត្ត ឱ្យមន្រ្តីបក្សចុះពង្រឹងមូលដ្ឋាន និងមន្រ្តីគណបក្សគ្រប់ថ្នាក់ទាំងអស់ បន្តធ្វើអំពើល្អ ខិតខំយកអស់កំលាំងកាយចិត្តនិងស្មារតីទទួលខុសត្រូវ បម្រើប្រជាជន ការផ្តល់សេវាសាធារណៈប្រកបដោយគុណភាព និងបង្រ្កាបទាន់ពេលវេលារាល់បទល្មើស នានា ដូចជា ក្មេងទំនើង បងតូចបងធំ ការប្រើប្រាស់គ្រឿងញឿន ការបន្តថែរក្សាសុខសន្តិភាព ពិសេសអនុវត្តឱ្យបានជាប្រចាំ នូវភូមិ-ឃុំ មានសុវត្ថិភាព និងលើកកម្ពស់ជីវភាពរស់នៅរបស់ប្រជាពលរដ្ឋ ឱ្យកាន់តែប្រសើរ ។ ឆ្លើយតបទៅនឹងសំណូមពរ របស់ក្រុមការងារគណៈបក្សមូលដ្ឋាន និងសមាជិកបក្សដែលជានារី មកពីភូមិទាំង ៥ ក្នុងឃុំព្រះពុទ្ធ ឯកឧត្តម ស៊ុន ចាន់ដារ៉ា ក្នុងនាមឯកឧត្តម ជឹម សុខ ដែលជាអនុប្រធានក្រុមការងារស្រុក និងជាប្រធានក្រុមការងារគណបក្សចុះជួលមូលដ្ឋានឃុំព្រះពុទ្ធ បានផ្ដល់នៅឧបករណ៍គ្រឿងបំពងសំឡេងដល់ស្នាក់ការគណបក្សប្រជាជនមូលដ្ឋានឃុំព្រះពុទ្ធ មួយកំប្លេ និងជូនសារុង និងថវិកា ដល់សមាជិកជាប្រធានក្រុមបក្ស លោកគ្រូអ្នកគ្រូ មកពីភូមិទាំង ៥ និងប្រជាការពារ ក្នុងឃុំព្រះពុទ្ធដែលជានារី ជាង ២០០ នាក់សម្រាប់ឱកាស ខួបលើកទី ១១៤ ទិវានារីអន្តរជាតិ ៨ មិនា ឆ្នាំ២០២៥ នេះ និងថវិកា សម្រាប់បម្រើការងារគណបក្សមូលដ្ឋានមួយចំនួនផងដែរ ។
