ព្រះវិហារ៖ នៅរសៀលថ្ងៃទី០៨ ខែមីនា ឆ្នាំ២០២៥ ឧត្តមសេនីយ៍ឯក ឃុន ធាងលី មេបញ្ជាការរង កងទ័ពជើងគោក ទទួលទឹសយោធភូមិភាគទី៤ តំណាង នាយ ឧត្ដមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ និងមេបញ្ជាការកងទ័ពជើងគោក និងជាតំណាងដ៍ខ្ពង់ខ្ពស់ នាយឧត្ដមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ។ បានអញ្ជើញចូលរួមដឹកនាំគោរពវិញ្ញាណក្ខន្ធ និងបំពាក់ឋានន្តរសក្តិជាកិច្ចបច្ឆាមរណៈ ថ្នាក់ឧត្ដមសេនីយ៍ ជូនសពលោក ឧត្ដមសេនីយ៍ទោ ស៊ិន ណារិទ្ធ នាយរងសេនាការ បញ្ជាការដ្ឋានកងទ័ពជើងគោក ដែលបានទទួលមរណៈភាពកាលពីវេលាម៉ោង ០៦:៣៥នាទីថ្ងៃទី០៦ ខែមីនា ឆ្នាំ២០២៥ ដោយរោគាពាធ។
ក្នុងឱកាសដ៏ក្រៀមក្រំបំផុតនេះ ឧត្ដមសេនីយ៍ឯក ឃុន ធាងលី មេបញ្ជាការរងកងទ័ពជើងគោក បានពាំនាំប្រសាសន៍ផ្តាំផ្ញើសួរសុខទុក្ខ និងចូលរួមរំលែកទុក្ខ ពីសំណាក់នាយឧត្ដមសេនីយ៍ ម៉ៅ សុផាន់ មេបញ្ជាការ កងទ័ពជើងគោក នាយឧត្តមសេនីយ៍ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ក្នុងនាមថ្នាក់ដឹកនាំ ក៏ដូចជាកងកម្លាំងទាំងអស់ សូមចូលរួមសម្ដែងនូវមរណៈទុក្ខ ដ៏ក្រៀមក្រំនេះ ព្រមទាំងសោកស្តាយជាពន់ពេក ចំពោះការបាត់បង់នាយទាហានសំខាន់មួយរូប ដែលកន្លងមកលោកបានលះបង់កម្លាំងកាយចិត្តចូលរួម បំពេញភារកិច្ចជូនជាតិមាតុភូមិ និងប្រជាជន មានសុខសន្តិភាព មានការអភិវឍ្ឈន ទៅតាមបទបញ្ជារបស់ថ្នាក់លើប្រគល់ជូនបានយ៉ាងល្អ ប្រសើរ។ ទន្ទឹមនឹងនោះដែរ ឧត្ដមសេនីយ៍ឯកឃុន ធាងលី មេបញ្ជាការរងកងទ័ពជើងគោក ក៍បានប្រទានភ្លើងបូជាសពស្ថិតនៅក្នុងបរិវេណវត្តប្រាសាទគោកបេង ភូមិគោកបេង សង្កាត់កំពង់ប្រណាក ក្រុងព្រះវិហារខេត្តព្រះវិហារផងដែរ៕
