ព្រះវិហារ៖ នាព្រឹកថ្ងៃទី២៤ ខែកញ្ញា ឆ្នាំ២០២៤ នៅស្នងការដ្ឋាននគរបាលខេត្តព្រះវិហារ មានរៀបចំកិច្ចប្រជុំបូកសរុបលទ្ធផលកិច្ចប្រតិបត្តិការ រយៈពេល០៩ខែ, និងផ្សព្វផ្សាយផែនការការពារបុណ្យកាន់បិណ្ឌ បុណ្យភ្ជុំបិណ្ឌ, ផ្សព្វផ្សាយសភាពការណ៍សន្តិសុខការងារឌីជីថល និង ផ្សព្វផ្សាយអនុក្រឹត្យស្តីពីការសុំច្បាប់ និងការអនុញ្ញាតច្បាប់របស់មន្ត្រីនគរបាលទៅតាមវិន័យកងកម្លាំង។
កិច្ចប្រជុំនេះធ្វើឡើង ក្រោមអធិបតីភាព លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្ត ដោយមានការចូលរួមពី លោក-លោកស្រី ឧត្តមសេនីយ៍ វរសេនីយ៍ ស្នងការរង អនុផែនការងារ នាយ-នាយរងការិយាល័យ លោកអធិការ ០៨ ក្រុង-ស្រុក និង លោកនាយប៉ុស្តិ៍ ទាំង៥១ ឃុំ-សង្កាត់ទូទាំងខេត្តព្រះវិហារផងដែរ។
ក្រោយពីបានស្ដាប់របាយការណ៏ រួចមកលោកឧត្ដមសេនីយ៍ទោស្នងការបានកោតសសើរដល់នាយ នាយរង ពលនគរបាលទាំងអស់ ដែលតែងតែខិតខំប្រឹងប្រែងបំពេញកិច្ចការងារបានយ៉ាងល្អប្រសើរនាកន្លងមក និងផ្សព្វផ្សាយនូវបទបញ្ជារបស់អគ្គស្នងការនគរបាលជាតិស្ដីអំពីសន្តិសុខសណ្ដាប់ធ្នាប់ទប់ស្កាត់បទល្មើសផ្សេងៗដែលមានកើតឡើងនៅក្នងភូមិសាស្ត្រខេត្ដព្រះវិហារនិងត្រូវបន្តយកចិត្តទុកដាក់ឱ្យបានម៉ឺងម៉ាត់ម្ចាស់ការត្រួតពិនិត្យការពារនូវពិធីបុណ្យកាន់បិណ្ឌ បុណ្យភ្ជុំបិណ្ឌ ជូនប្រជាពលរដ្ឋ៕
