ដោយ៖ សេង ពិសិដ្ឋ
ព្រះវិហា÷ នៅព្រឹក ថ្ងៃទី ២៣ ខែកញ្ញា ឆ្នាំ២០២៤ទីបញ្ជាការតំបន់ប្រតិបត្តិការសឹករងព្រះវិហារ បានរៀបចំកិច្ច ប្រជុំបូកសរុបលទ្ធផលការងារយោធា សន្តិសុខ ឆមាសទី១ និងទិសដៅអនុវត្តបន្ដ ឆមាសទី២ ឆ្នាំ២០២៤ ក្រោមអធិបតីភាព ឯកឧត្ដម ឧត្ដមសេនីយ៍ទោ ច័ន្ទ សុភ័ក្ដ្រា មេបញ្ជាការ តំបន់ប្រតិបត្តិការសឹករងព្រះវិហារ និងមានការអញ្ជើញចូលរួមពីសំណាក់ ឯកឧត្ដម លោក មេបញ្ជាការរង នាយសេនាធិការ នាយសេនាធិការរង នាយការិយាល័យ-ផ្នែក មេបញ្ជាការ គ្រប់បណ្ដាស្រុក-ក្រុងទាំង៨ មេបញ្ជាការកងអនុសេនាធំ និងអង្គភាពចំណុះទីបញ្ជាការតំបន់ប្រតិបត្តិការសឹករងព្រះវិហារច្រើនរូប ។
ក្នុងកិច្ចប្រជុំនោះដែរ ឯកឧត្តម មេបញ្ជាកា បានផ្សព្វផ្សាយនូវបទបញ្ជារបស់ឯឧត្ដម នាយឧត្ដមសេនីយ៍ អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ស្ដីអំពីការចុះបង្ក្រាបការពារទប់ស្កាត់បទល្មើសកាប់ព្រៃឈើអភិរក្សរបស់រដ្ឋយកដីធ្វើកម្មសិទ្ធ នឹងបទល្មេីសផ្សេងៗ តាមបទបញ្ជាដ៍ខ្ពង់ខ្ពស់របស់ប្រមុខរាជរដ្ឋាភិបាល នៅក្នងភូមិសាស្ត្រខេត្ដព្រះវិហារ ជូនដល់អង្គប្រជុំអោយបានជ្រាប និងបានដាក់បទបញ្ជាដល់បណ្តាកងឯកភាពដែលឈរជើងនៅជាប់តាមខ្សែបន្ទាត់ព្រំដែន កម្ពុជា- ថៃ-ឡាវ ត្រូវបន្តយកចិត្តទុកដាក់ឱ្យបានម៉ឺងម៉ាត់ ម្ចាស់ការត្រួតពិនិត្យ និងដើរល្បាតឱ្យបានជាប់ជាប្រចាំ ដើម្បីធានាការពារអោយបាននូវបូរណភាពទឹកដី និងទប់ស្កាត់អោយបាននូវរាល់បទល្មើស ពិសេសបញ្ហាគ្រឿងញៀន។
ក្រោយពីបានស្ដាប់របាយការណ៍តាមបណ្ដាកងឯកភាព ឯកឧត្តម មេបញ្ជាការ បានធ្វើការកោតសរសើរដល់បណ្តាកងឯកភាពទាំងអស់ ដែលតែងតែខិតខំប្រឹងប្រែងបំពេញកិច្ចការងារបានយ៉ាងល្អប្រសើរនាកន្លងមក និងបានផ្តាំផ្ញើដល់ នាយទាហាន នាយទាហានរង និងពលទាហាន ទាំងអស់ សូមជៀសវាងអោយឆ្ងាយពីការប្រើប្រាស់គ្រឿងញៀនគ្រប់ប្រភេទ៕
