ឧត្តរមានជ័យ៖ ឯកឧត្ដម អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃទី២១ ខែកញ្ញា ឆ្នាំ២០២៤ បានដឹកនាំប្រតិភូអញ្ជើញចុះសួរសុខទុក្ខ សំណេះសំណាល និងនាំសម្ភារ ថវិកា មកចែកជូននាយទាហាន នាយទាហានរង និងពលទាហាន អង្គភាពកងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ ដែលជាអង្គភាពសម្ព័ន្ធមេត្រីភាព ក្នុងឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរ។
ឯកឧត្ដម អ៊ុន ចាន់ដា បានថ្លែងថា៖សម្ព័ន្ធមេត្រីភាពរវាងកងពលតូចអន្តរាគមន៍លេខ៦ ជាមួយរដ្ឋបាលខេត្តកំពង់ចាម គឺក្រោមគំនិតផ្តចចផ្តើមរបស់សម្តេចឧត្តមទេពញាណ ហ៊ុន ណេង នៅពេលដែលសម្តេចនៅជាអភិបាលខេត្តកំពង់ចាមនាពេលនោះ។លោកថាយើងខ្ញុំទាំងអស់គ្នាដែលជាអ្នកបន្តវេន ជាថ្នាក់ដឹកនាំជំនាន់ក្រោយ នៅតែបន្តរក្សានូវប្រពៃណីដ៍ល្អមួយនេះ គឺបន្តពង្រឹងនូវការចងសម្ព័ន្ធមេត្រីភាព ហើយខិតខំរិះរកនូវមធ្យោបាយនិងធនធានដើម្បីជាការដោះស្រាយសំណើរ សំណូមពរ បងប្អូនកងកម្លាំង។
ឯកឧត្ដម អភិបាលខេត្តកំពង់ចាមថ្លែងទៀតថា៖ការជួបជុំគ្នាដ៍សប្បាយរីករាយនាពេលនេះ បានបង្ហាញឱ្យឃើញពីការបន្តនូវប្រពៃណី ដែលថ្នាក់ដឹកនាំខេត្តកំពង់ចាមជំនាន់មុនបានបន្តបន្សល់ទុកមកដល់នាពេលបច្ចុប្បន្ននេះ ហើយយើងនឹងខិតខំនៅក្នុងការជួយគ្នាទៅវិញទៅមកមិនថាសមូរភូមិមុខ សមូរភូមិក្រោយទេ គឺដំណាក់កាលណាក៏ដោយនៅពេលដែលប្រទេសរបស់យើងមានសុខសន្តិភាព គឺជាឱកាសនៃការតបស្នង ហើយនៅពេលដែលប្រទេសរបស់យើងជួបនូវកលយុគឫយ៉ាងណានោះគឺបងប្អូនកងកម្លាំងប្រដាប់អាវុធដែលឈរជើងតាមខ្សែបន្ទាត់ព្រំដែននេះធានានូវបូរណៈភាពទឹកដី នេះជាការជួយគ្នាទៅវិញទៅមកដើម្បីធ្វើឱ្យប្រទេសរបស់យើងមានសុខសន្តិភាពទទួលបាននូវការអភិវឌ្ឍន៍រីកចម្រើនជាបន្តបន្ទាប់ ស្របតាមគោលនយោបាយដ៍ត្រឹមត្រូវរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាយើងនាពេលបច្ចុប្បន្ននេះ។
ឯកឧត្ដម អ៊ុន ចាន់ដា ក៏បានថ្លែងប្រាប់នាយទាហាន នាយទាហានរង និងពលទាហាន កងពលតូចអន្តរាគមអ៍លេខ៦ទាំងអស់ថា សម្តេចមហាបវរធិបតី ហ៊ុន ម៉ាណែត នៅយប់មុិញនេះបានប្រកាសបញ្ឈប់នូវកិច្ចសហប្រតិបត្តិការតំបន់ត្រីកោណអភិវឌ្ឍន៍ ដើម្បីកុំឱ្យក្រុមប្រឆាំងក្រៅច្បាប់ ក្រុមជ្រុលនិយមមួយក្តាប់តូចយកកិច្ចសហប្រតិបត្តិការតំបន់ត្រីកោណអភិវឌ្ឍន៍ធ្វើជានយោបាយ ធ្វើជាឧបករណ៍នយោបាយតទៅទៀត ដូច្នេះសម្តេចប្រកាសបញ្ឈប់តែម្តង។លោកថ្លែងបញ្ជាក់ប្រាប់កងទ័ពទៀតថា កិច្ចសហប្រតិបត្តិការតំបន់ត្រីកោណអភិវឌ្ឍន៍ គឺបានផ្តល់ផលប្រយោជន៍ច្រើនណាស់ដល់ប្រទេសរបស់យើង ប៉ុន្តែអ្វីលើកឡើងដោយក្រុមប្រឆាំងនៅក្រៅប្រទេស គឺជាមូលហេតុមួយប៉ុនប៉ងផ្តួលរំលំរាជរដ្ឋាភិបាលតែប៉ុណ្ណោះ។
ក្នុងនាមរដ្ឋបាលខេត្តកំពង់ចាម ឯកឧត្ដម អ៊ុន ចាន់ដា បានប្រកាសផ្តល់រថយន្តម៉ាកស្តារិចចំនួន២គ្រឿង ដល់អង្គភាពកងពលតូចអន្តរាគមន៍លេខ៦ សម្រាប់ប្រើប្រាស់តាមត្រូវការ ឧបត្ថម្ភថវិកាដល់ទីបញ្ជាការកងពលចំនួន៥០លានរៀល ឧបត្ថម្ភកងពលធំអន្តរាគមន៍លេខ២ ថវិកា១០លានរៀល ឧបត្ថម្ភនាយទាហាន នាយទាហានរង និងពលទាហាន ចំនួន១៣៦១នាក់ ក្នុងម្នាក់ៗទទួលបានថវិកា៣មុឺនរៀល ទឹកក្រូចចំនួន៥៥០កេស មីចំនួន៦០០កេស ទឹកសុទ្ធ១០០កេស ចេកអំបូងលឿងចំនួន១៥០កេស សម្ភារបរិក្ខាវេជ្ជសាស្ត្រផ្តល់ជូនមន្ទីរពេទ្យកងពល និងសម្ភារមួយចំនួនទៀត ព្រមទាំងបានកាត់ខ្សែបូរណ៍ដាក់ឱ្យប្រើប្រាស់ជាផ្លូវការមន្ទីរពេទ្យកងពលតូចអន្តរាគមន៍លេខ៦ ចាប់ពីថ្ងៃនេះតទៅ៕ ដោយ៖ សេង ពិសិដ្ឋ
