ព្រះវិហារ៖ ឧត្ដមសេនីយ៏ទោ ច័ន្ទ សុភ័ក្ដ្រា មេបញ្ជាការតំបន់ប្រតិបត្តិការសឹករងព្រះវិហារ យោធភូមិភាគទី៤ កងទ័ពជើងគោក បានដាក់បទបញ្ជាដល់បណ្តាកងឯកភាពដែលឈរជើងនៅជាប់តាមខ្សែបន្ទាត់ព្រំដែន កម្ពុជា- ថៃ-ឡាវ ត្រូវបន្តយកចិត្តទុកដាក់ឱ្យបានម៉ឺងម៉ាត់ ម្ចាស់ការត្រួតពិនិត្យ និងដើរល្បាតឱ្យបានជាប់ជាប្រចាំ ដើម្បីធានាការពារអោយបាននូវបូរណភាពទឹកដី និងទប់ស្កាត់អោយបាននូវរាល់បទល្មើសផ្សេងៗ ពិសេសគ្រឿងញៀន
និងទប់ស្កាត់នៅអំពើ វិទ្ធង្សនាផ្សេងៗ ដែលចង់ផ្ដួលរំលំរដ្ឋាភិបាលនិងធ្វើអោយរាំងស្ទះនៅការអភិវឌ្ឈន៏តំបន់ត្រីកោណ ខ្សែបន្ទាត់ព្រំដែន។
ការដាក់បទបញ្ជានេះធ្វើឡើងកាលពីព្រឹកថ្ងៃទី ០៥ ខែកញ្ញា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងព្រះវិហារ ក្នុងកិច្ចប្រជុំ បូកសរុបលទ្ធផលការងារយោធា សន្តិសុខ ប្រចាំខែសីហា និងទិសដៅអនុវត្ដបន្ដ ប្រចាំខែកញ្ញា ឆ្នាំ២០២៤ មានការអញ្ជើញចូលរួម លោកមេបញ្ជាការរង នាយសេនាធិការ លោកនាយសេនាធិការរង លោកនាយការិយាល័យ-ផ្នែក លោកមេបញ្ជាការក្រុង-ស្រុក និងលោកមេបញ្ជាការ វរសេនាតូចទាំងពីរ និងអង្គភាពចំណុះទីបញ្ជាការជាច្រើនរូប។
នៅក្នុងកិច្ចប្រជុំនោះដែរ ឯកឧត្ដម មេបញ្ជាការ បានស្ដាប់របាយការណ៍ស្ដីអំពីការចុះបង្ក្រាបការពារទប់ស្កាត់បទល្មើសកាប់ព្រៃឈើ អភិរក្សរបស់រដ្ឋយកដីធ្វើកម្មសិទ្ធ តាមបណ្ដាអង្គភាពនឹងចំណុចគោលដៅដែលកំពុងអនុវត្ត ឯកឧត្តម មេបញ្ជាការ បានធ្វើការកោតសរសើរដល់បណ្តាកងឯកភាពទាំងអស់ ដែលតែងតែខិតខំប្រឹងប្រែងបំពេញកិច្ចការងារបានយ៉ាងល្អ និងបានផ្តាំផ្ញើដល់ នាយទាហាន នាយទាហានរង និងពលទាហាន ទាំងអស់ សូមជៀសវាងអោយឆ្ងាយពីការប្រើប្រាស់គ្រឿងញៀនគ្រប់ប្រភេទ។
បន្ថែមលើនេះ កងកម្លាំងទាំងអស់ សូមប្តេជ្ញាការពារ និងថែរក្សា ឲ្យបានដាច់ខាតនូវសុខសន្តិភាព សន្តិសុខជាតិ ស្ថិរភាពសង្គម និងសណ្តាប់ធ្នាប់សាធារណៈគ្រប់កាលៈទេសៈ ព្រមទាំងប្រឆាំងដាច់ខាត ក្នុងចេតនាបំផ្លិចបំផ្លាញ ផលប្រយោជន៍ជាតិ បំផ្លាញសន្តិភាពនៅកម្ពុជា៕ seng piseth
