ដោយ៖ សេង ពិសិដ្ឋ
ព្រះវិហារ÷ នាព្រឹកថ្ងៃ ទី២៨ ខែឧសភា ឆ្នាំ២០២៤នេះ ឯកឧត្ដម គីម រិទ្ធី អភិបាលនៃ គណៈអភិបាល និងជាប្រធានកិត្តិយសសាខាសមាគម អតីតយុទ្ធជនកម្ពុជាខេត្ត អញ្ជើញជាអធិបតី ក្នុងពិធីប្រគល់និងទទួលគ្រឿងឧបភោគ បរិភោគ ដល់សាខាសមាគមអតីតយុទ្ធជនកម្ពុជាខេត្ត តាមរយៈមន្ទីរសង្គមកិច្ច និងយុវនីតិសម្បទាខេត្តព្រះវិហារ។
ពិធីប្រគល់និងទទួលនេះដែរ មានការចូលរួមពីសំណាក់ លោក លោកស្រី អភិបាលរងខេត្ត មន្ទីរអង្គភាពចំណុះរដ្ឋបាលខេត្តជាច្រើនរូប។
លោក រស់ ស៊ីថា ប្រធានមន្ទីរ សង្គមកិច្ច និងយុវនិតិសម្បទាខេត្តបានឡើងរាយការណ៍អំពីរបាយការណ៍ដែលទទួលអំណោយពីសំណាក់រាជរដ្ឋាភិបាលជូនគណៈអធិបតី រួចមក ឯកឧត្ដម ឧត្ដមសេនីយ៍ទោ ច័ន្ធ សុភត្រ្តា មេបញ្ជាការតំបន់ប្រតិបត្តិការសឹករង និងជាប្រធានសមាគមន៍អតីតយុទ្ធជនកម្ពុជាខេត្តព្រះវិហារ បានរាយការណ៍លំអិតអំពីសមាជិកសមាគមអតីតយុទ្ធជនកម្ពុជាទូទាំងខេត្ត មានការលំបាកជាច្រើន ជូនអង្គពិធីផងដែរ។
ឯកឧត្ដម គីម រិទ្ធី អភិបាល នៃគណៈអភិបាលខេត្ដ និងជាប្រធានកិត្តិយស សមាគមអតីតយុទ្ធជនកម្ពុជាខេត្តព្រះវិហារ បានលើកឡើងថា សម្ភារៈទាំងអស់នេះជាអំណោយដ៏ថ្លៃថ្លារបស់ប្រមុខរាជរដ្ឋាភិបាល ដើម្បីត្រៀមចែកបន្តជូនដល់សមាជិកសមាគម អតីតយុទ្ធជនកម្ពុជាខេត្ដ ដែលមានជីវភាពខ្វះខាតរួមនិងប្រជាពលរដ្ឋងាយរងគ្រោះ សូមអោយសមាគមចាត់ចែងតាមតម្រូវការដល់ប្រជាពលរដ្ឋរបស់យើងដែលជួបការលំបាក មិនថានៅទីណាឬកន្លែងណានោះទេ អោយតែមានការលំបាកយើងនាំអំណោយនេះទៅប្រគល់ជូនគាត់ដល់កន្លែងតែម្ដង៕
