ព្រះវិហារ៖ នៅព្រឹកថ្ងៃទី ២៤ ខែតុលា ឆ្នាំ២០២៣ នៅទីបញ្ជាការតំបន់ប្រតិបត្តិការសឹករងព្រះវិហារ បានរៀបចំកិច្ចប្រជុំ បូកសរុបលទ្ធផលការងារយោធា សន្តិសុខ ប្រចាំខែកញ្ញា និងទិសដៅអនុវត្ដបន្ដ ប្រចាំខែតុលា ឆ្នាំ២០២៣ ក្រោមអធិបតីភាព ឯកឧត្ដម ឧត្ដមសេនីយ៍ទោ ច័ន្ទ សុភ័ក្ដ្រា មេបញ្ជាការ តំបន់ប្រតិបត្តិការសឹករងព្រះវិហារ និងមានការអញ្ជើញចូលរួមពីសំណាក់ លោកមេបញ្ជាការរង នាយសេនាធិការ លោកនាយសេនាធិការរង លោកនាយការិយាល័យ-ផ្នែក លោកមេបញ្ជាការក្រុង-ស្រុក និងមេបញ្ជាការ វរសេនាតូចទាំងពីរ និងអង្គភាពចំណុះទីបញ្ជាការ។
នៅក្នុងកិច្ចប្រជុំនោះដែរ ឯកឧត្ដម មេបញ្ជាការ បានមានប្រសាសន៍លើកឡើង អំពីសភាពការណ៍ជាតិ និងអន្តរជាតិថ្មីៗ និងផែនការរបស់ថ្នាក់លើប្រគល់ជូន ដល់នាយទាហាន នាយទាហានរង ពលទាហានទាំងអស់អោយបានជ្រាប និងបានបន្តដាក់បទបញ្ជាដល់បណ្តាកងឯកភាពដែលឈរជើងនៅជាប់តាមខ្សែបន្ទាត់ព្រំដែន កម្ពុជា- ថៃ-ឡាវ ត្រូវបន្តយកចិត្តទុកដាក់ឱ្យបានម៉ឺងម៉ាត់ ជាម្ចាស់ការត្រួតពិនិត្យ និងដើរល្បាតឱ្យបានជាប់ជាប្រចាំ ដើម្បីធានាការពារអោយបាននូវបូរណភាពទឹកដី និងទប់ស្កាត់អោយបាននូវរាល់បទល្មើសផ្សេងៗក្នុងដែនរបស់ខ្លួន។
ឯកឧត្តម មេបញ្ជាការ បានធ្វើការកោតសរសើរដល់បណ្តាកងឯកភាពទាំងអស់ ដែលតែងតែខិតខំប្រឹងប្រែងបំពេញកិច្ចការងារបានយ៉ាងល្អនាពេលកន្លងមក និងបានផ្តាំផ្ញើដល់ នាយទាហាន នាយទាហានរង និងពលទាហាន ទាំងអស់ សូមជៀសវាងអោយឆ្ងាយពីការប្រើប្រាស់គ្រឿងញៀនគ្រប់ប្រភេទ តែបើអង្គភាពដឹងច្បាស់ថាបុគ្គលណាជាប់ពាក់ព័ន្ធនិងបណ្ដេញចេញពីអង្គភាពដោយស្វាយប្រវត្តតែម្ដង៕
