ព្រះសីហនុ៖ ករណីប្លន់កាលពីយប់ថ្ងៃទី 9 ខែតុលាឆ្នាំ 2023 រងរបួសស្ត្រីពីរនាក់ត្រូវបានបញ្ជូនសង្គ្រោះនៅមន្ទីរពេទ្យ ចំណែកឯកូនប្រុសជនរងគ្រោះដែលជនល្មើសនាំយកទៅជាមួយបានស្លាប់ហើយ ក្នុងនោះសមត្ថកិច្ចរកឃើញសាកសព នៅព្រៃខាងក្រោយផ្ទះជនរងគ្រោះ ប្រហែលជិត១០០ម៉ែត្រ។
ជនរងគ្រោះដែលរងរបួសរួមមានឈ្មោះ ខុន រី ភេទស្រី អាយុ៣៦ឆ្នាំ ត្រូវជាក្មួយម្ចាស់ផ្ទះ និងឈ្មោះ ហុឹម ខេន ភេទស្រី អាយុ៨១ឆ្នាំ ជាម្ចាស់ផ្ទះ ចំណែកកូនប្រុសម្ចាស់ផ្ទះដែលស្លាប់នោះ មានឈ្មោះ ហុឹម ប៉ូឡូ ភេទប្រុសអាយុ៤៣ឆ្នាំ។
គិតមកត្រឹមមុនថ្ងៃត្រង់ថ្ងៃទី១០ ខែតុលា ឆ្នាំ២០២៣នេះ ប្រតិបត្តិការស្វែងរកជនដៃដល់ កំពុងធ្វើបន្តពីសំណាក់កម្លាំងសមត្ថកិច្ចចំរុះ គណបញ្ជាការឯកភាពរដ្ឋបាលខេត្ត ជាមួយការរំពឹងទុកថា ជនល្មើសនឹងមិនអាចរត់គេចខ្លួនបានឡើយ។
សូមបញ្ជាក់ថា កាលពីយប់ថ្ងៃទី៩ ខែតុលា ឆ្នាំ២០២៣ មានជនសង្ស័យចូលប្លន់ផ្ទះលក់ដូរមួយកន្លែង បានវាយទៅលើស្ត្រីម្ចាស់ផ្ទះពីរនាក់ឲ្យរងរបួសធ្ងន់ ខណៈបុរសម្ចាស់ផ្ទះត្រូវជនសង្ស័យនាំយកទៅជាមួយបាត់ កើតហេតុស្ថិតនៅភូមិអូរតាសេក ឃុំទំនប់លក ស្រុកស្ទឹងហាវ ខេត្តព្រះសីហនុ៕
