ដោយ៖សេង ពិសិដ្ឋ
ព្រះវិហារ៖ នាព្រឹកថ្ងៃទី ២៨ ខែឧសភា ឆ្នាំ២០២៣នេះ ឯកឧត្ដម ឧត្ដមសេនីយ៍ទោ ច័ន្ទ សុភ័ក្ដ្រា មេបញ្ជាការ តំបន់ប្រតិបត្តិការសឹករងព្រះវិហារ និងជាប្រធានសមាគមអតីតយុទ្ធជនកម្ពុជាខេត្ដព្រះវិហារ បានអញ្ជើញដឹកនាំក្រុមការងារសមាគមអតីតយុទ្ធជនកម្ពុជាខេត្ត ចូលរួមគោរពវិញ្ញាណខ័ក្ខរំលែកទុក្ខ ដល់គ្រួសារសព លោកតាដែលមានឈ្មោះ រស់ ផាវ អាយុ៧៩ឆ្នាំ មុខសញ្ញា និវត្តន៍ជន បានទទួលមរណៈភាពនៅថ្ងៃទី ២៧ ខែឧសភា ឆ្នាំ២០២៣ នៅគេហដ្ឋាននៃសព ស្ថិតនៅភូមិសំរោង សង្កាត់កំពង់ប្រណាក់ ក្រុងព្រះវិហារ ខេត្តព្រះវិហារ។ ក្នុងនោះដែរ ឯកឧត្តម ប្រធានសមាគម បាននាំយកថវិកាបេឡាមរណៈសង្រ្គោះចំនួន ៤,០០០,០០០៛ ផ្ដល់ជូនដល់គ្រួសារសព និងសម្ភារថវិការមួយចំនួន ដើម្បីចូលរួមក្នុងពិធីបុណ្យសពផងដែរ ។
ស្ថិតក្នុងឱកាសនោះ ឯកឧត្តម ប្រធានសមាគមបានពាំនាំប្រសាសន៍ផ្ដាំផ្ញើសួរសុខទុក្ខ និងចូលរួមរំលែកមរណៈទុក្ខជាមួយក្រុមគ្រួសារនៃសពអតីតយុទ្ធជនពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីព្រះរាជាណាចក្រកម្ពុជា ជាប្រធានសមាគមអតីតយុទ្ធជនកម្ពុជា ឯកឧត្ដម ទេសរដ្ឋមន្រ្តី គន់ គីម អនុប្រធាន និងជាអគ្គលេខាធិការសមាគម ឯកឧត្ដម ហ៊ុន ម៉ាណែត មេបញ្ជាការកងទ័ពជើងគោក ចែកជូនដល់គ្រួសារសពផងដែរ។
ក្នុងនោះសម្ភារៈរួមមាន៖ ១.អង្ករ ១ប៉េ ស្មើ៣០គីឡូក្រាម ២.ម៊ី ១កេស ៣.ទឹកត្រី ១យួរ ៤.ត្រីខ ១យួរ រួមនិងថវិការចំនួន ៥៥០.០០០រៀលចូលបុណ្យសពផងដែ៕
