ខេត្តមណ្ឌលគិរី ៖ ឯកឧត្តម វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងនាយឧត្តមសេនីយ៍ ខ្វាន់ ស៊ាម អគ្គមេបញ្ជាការរង មេបញ្ជាការដ្ឋានវិស្វកម្ម រួមដំណើរដោយអាជ្ញាធរខេត្តមណ្ឌលគិរី បានអញ្ជើញចុះត្រួតពិនិត្យសំណង់បង្គោលខណ្ឌសីមាព្រំដែន និងផ្លូវខ្សែក្រវាត់ព្រំដែនកម្ពុជា-វៀតណាម រយៈពេលពីរថ្ងៃ ២៨,២៩ មេសា ២០២២ ដែលស្ថាបនាដោយកងឯកភាពលេខ៧១១ កងឯកភាពវត្ថុរារាំងលេខ៧២ កងឯកភាពស្ថាបនាសំណង់សិល្បការ្យលេខ៧៤ នៃបញ្ជាការដ្ឋានវិស្វកម្ម អគ្គបញ្ជាការ ក្នុងភូមិសាស្ត្រស្រុកពេជ្រាដា និងស្រុកកែវសីមា ខេត្តមណ្ឌលគិរី។
ឯកឧត្តម វ៉ា គឹមហុង បានមានប្រសាសន៍កោតសរសើរ និងវាយតំលៃខ្ពស់ចំពោះកងឯកភាពលេខទាំង៣ និងអាជ្ញាធរគ្រប់លំដាប់ថ្នាក់ ដែលបានយកចិត្តទុកដាក់ ពុះពារជម្នះនូវ រាល់ឧបសគ្គ- ការលំបាកគ្រប់បែបយ៉ាង ខិតខំប្រឹងប្រែង ធ្វើការ ស្ថាបនា ផ្លូវខ្សែក្រវាត់ព្រំដែន និងផ្លូវតភ្ជាប់លើទឹកដី ស្រុកពេជ្រាដា ខេត្តមណ្ឌលគិរី រហូតមកដល់ថ្ងៃនេះ សម្រេចបានលទ្ធផលយ៉ាងច្រើនគួរជាទីពេញចិត្ត។ ឯកឧត្តម បានបញ្ជាក់ថា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រី បានដាក់ចេញនូវនយោបាយកសាងព្រំដែន : «កសាងព្រំដែនកម្ពុជា ជាប់ជាមួយប្រទេសជិតខាង ជាព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍ ប្រកបដោយចីរភាព» ដោយដើរទន្ទឹមនឹងការអនុវត្ត «គោលការណ៍កសាងខឿនការពារប្រទេស គឺជារបស់ប្រជាជនគ្រប់រូប » ព្រមទាំងរួមចំណែកក្នុងការរៀបចំកិច្ចការសង្គម បើកច្រកព្រំដែននានា ការពង្រីកវិស័យកសិឧស្សាហកម្ម ទេសចរណ៍ បង្កើនផលិតផលប្រកបដោយសក្តានុពលពហុវិស័យជំរុញកំណើនសេដ្ឋកិច្ច ជីវភាពរស់នៅរបស់ប្រជាជន រួមចំណែកកសាងពង្រឹងខឿនការពារជាតិ ដោយផ្អែកលើប្រជាជនធ្វើជាមូលដ្ឋានគ្រឹះគ្រឹះដ៏រឹងមាំ មិនចេះរីងស្ងួត នឹងធ្វើជាសក្សីរស់ប្រកបដោយនិរន្តរភាព រួមទាំង «ការងារកសាងបោះបង្គោលខ័ណ្ឌសីមា និងការកសាងផ្លូវជាដៃគូបំពេញឱ្យគ្នាទៅវិញទៅមក» ។ ឯកឧត្តម នាយឧត្តមសេនីយ៍ ខ្វាន់ ស៊ាម មានប្រសាសន៍ ណែនាំ និងក្រើនរំលឹកដល់មេបញ្ជាការ មេបញ្ជាការរង និងនាយទាហាន នាយទាហានរង ពលទាហាន នៃកងឯកភាពទាំង៣ ត្រូវសហការជាមួុយអាជ្ញាធរដែនដី និងសមត្ថកិច្ចនៅតាមខ្សែបន្ទាត់ព្រំដែន ដើម្បីធ្វើយ៉ាងណា ឲ្យដំណើរការស្ថាបនាផ្លូវ និងរាល់សំណង់សិល្បការ្យ ឱ្យបានត្រឹមត្រូវ តាមបទដ្ឋានលក្ខណៈបច្ចេកទេស សំដៅធានាឲ្យរាល់សំណង់ មានសោភ័ណភាព មានគុណភាពរឹងមាំ និងសម្រេចបានជោគជ័យនូវភារកិច្ចជាប្រវត្តិសាស្ត្រ ដែលសម្ដេចអគ្គមហាសេនាបតីតេជោ នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចពិជ័យសេនា អាជ្ញាធរជាតិទទួលបន្ទុកកិច្ចការព្រំដែន និងថ្នាក់ដឹកនាំអគ្គបញ្ជាការ នៃកងយោធពលខេមរភូមិន្ទ ជឿទុកចិត្តប្រគល់ឲ្យ។
ក្នុងឱកាសចុះបំពេញបេសកម្មនោះដែរ ក៏បានផ្តល់ជាគ្រឿងឧបភោគបរិភោគមួយចំនួន ជូនដល់កងវិស្វកម្ម ដែលកំពុងស្ថាបនាផ្លូវក្រវ៉ាត់ព្រំដែននោះផងដែរ៕
