ខេត្តប៉ៃលិន ៖ នៅរសៀលថ្ងៃទី០៤ ខែកុម្ភៈ ឆ្នាំ២០២២២ លោកជំទាវ បាន ស្រីមុំ អភិបាលខេត្ត ប៉ៃលិន ឯកឧត្ដម សៅ សារ៉ាត់ អ្នកតំណាង រាស្ត្រ មណ្ឌល ប៉ៃលិន ឯកឧត្ដម ប្រធានក្រុមប្រឹក្សាខេត្ត ឯកឧត្តម លោកជំទាវ លោក-លោកស្រី លោក គ្រូ អ្នក គ្រូ សិស្សានុសិស្ស និងមាតាបិតាសិស្ស ប្រមាណ៤០០នាក់ បានចូលរួមក្នុងពិធី សំណេះសំណាល និងផ្តល់ រង្វាន់ លេីកទឹកចិត្តដល់សិស្សប្រឡងជាប់ សញ្ញាបត្រ មធ្យមសិក្សា ទុយិភូមិ និទ្ទេស A,B,C,D,E នៅក្នុង បរិវេណ សាលាខេត្ត ប៉ៃលិន ។
នៅក្នុងពិធីនេះ លោកជំទាវ អភិបាលខេត្តប៉ៃលិន ថ្លែងអំណរគុណយ៉ាងជ្រាលជ្រៅដល់លោកគ្រូអ្នកគ្រូ នៃ វិទ្យាល័យ ទាំងពីរ ក្នុងខេត្តប៉ៃលិន ដែលបានខិតខំយកចិត្តទុកដាក់បង្រៀនដល់សិស្សានុសិស្សរបស់ខ្លួន ដែលបានប្រឡងជាប់សញ្ញាប័ត្រមធ្យមសិក្សាទុតិយភូមិ និទ្ទេស A ដល់ទៅ ៦នាក់ដែលជាចំនួនមួយ ជា ប្រវត្តិសាស្ត្រ សម្រាប់ ខេត្ត ប៉ៃលិន ។
លោក ជំទាវ បានថ្លែងអំណរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំសុខសន្តិភាពជូនប្រជាជាតិ និងបានលើកស្ទួយវិស័យអប់រំអោយមានការរីកចម្រើនប្រកបដោយគុណភាពខ្ពស់ ។ លោកជំទាវផ្ទាល់ក៏បានផ្តាំផ្ញើដល់ក្មួយៗជាសិស្សដែលទទួលបានរង្វាន់ នាពេលនេះ សូម យកទុកដាក់រៀនសូត្របន្តទៀត ដើម្បីអនាគតរបស់ខ្លួនមានភាពភ្លឺស្វាង ។ ម្យ៉ាងវិញទៀត ត្រូវចូលរួម គោរព ច្បាប់ ចរាចរណ៍ ពេលបើកម៉ូតូត្រូវពាក់មួកសុវត្ថិភាពឲ្យបានខ្ជាប់ខ្ជួន និងត្រូវគោរពគំនូសសញ្ញាចរាចរណ៍និងផ្លាក សញ្ញាចរាចរណ៍តាមដងផ្លូវគេចផុតពីគ្រោះថ្នាក់ចរាចរណ៍ជាយថាហេតុទាំងឡាយ និងត្រូវ ជៀសឱ្យឆ្ងាយពីគ្រឿងញៀនអាចនាំឲ្យខូចអនាគតក្នុងការ សិក្សា ។
យោងតាមស្ថិតិលោកតង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិន បានឲ្យដឹងថា សម្រាប់ការប្រឡងសញ្ញាបត្រ័ទុតិយភូមិនៅក្នុងឆ្នាំ២០២១នេះ គឺមានបេក្ខជនប្រឡងទូទាំងខេត្តប៉ៃលិន សរុបចំនួន៤៩៥នាក់ស្រី ២៧០នាក់ មណ្ឌលប្រឡងមានចំនួន០២មណ្ឌល និងមាន២១បន្ទប់ ។ជាលទ្ធផលបេក្ខជនប្រឡងជាប់មានចំនួន ៣២៥នាក់ ស្មើនឹង ៦៧,៧០% ក្នុងនោះមាននិទ្ទេស A ៦នាក់, និទ្ទេស B ៦នាក់, និទ្ទេស C ៣៥នាក់, និទ្ទេស D ១២០នាក់ និងនិទ្ទេស E ១០៥នាក់។
