ព្រះវិហារ៖ ប្រជាពលរដ្ឋរស់នៅឃុំស្រយង់ ស្រុកគូលែន ខេត្តព្រះវិហារប្រមាណ១០គ្រួសារ បានលើកឡើងថា មានបុគ្គលម្នាក់ឈ្មោះ ក្រូច ប៊ុនគីម ជាមន្ត្រីយោធាពាក់សក្តិ៣ មានតួរនាទីជាដឺបេ បម្រើការក្នុងអង្គភាពយោធភូមិភាគទី៤ បានប្រើគ្រឿងចក្រឈូសឆាយដីព្រៃសហគមន៍ និងរំលោភយកដីរបស់ពួកគាត់ទាំង ដែលដីរបស់ពួកគាត់មានសលាកបត្រទៀតផង។
តំណាងប្រជាពលរដ្ឋរងគ្រោះទាំង១០គ្រួសារ លោក ហេង សុឃី បានលលើកឡើងថា ដីរបស់គាត់មានទាំងឯកសារទិញពីម្ចាស់ដើម ព្រមទាំងសលាកបត្រផងនោះ ស្ថិតនៅចំណុចត្រពាំងថ្លុង ក្នុងភូមិក្តាក់ ឃុំភ្នំត្បែងពីរ ស្រុកគូលែន ខេត្តព្រះវិហារ មានចំនួន១០ហិចតា ដែលខ្លួនបានទិញពីឈ្មោះ ម៉ៅ ម៉ាឡែន កាលពីថ្ងៃទី១៣ ខែ១១ ឆ្នាំ២០០៧ មកម្ល៉េះ ហើយក្នុងឆ្នាំ២០០៧ លោកក៏បានដាំចេកនៅលើដីនោះដែរ តែក្រោយពីដាំចេកខាងលើក៏ត្រូវបានភ្លើងឆេះ រាលឆេះចេកដែលខ្លួនបានដាំនោះងាប់អស់ ក្រោយមកដោយសារជំងឺកូវីដ លោកក៏បានទុកដីខាងលើនៅទំនេរមួយរយៈ លុះនៅអំឡុងឆ្នាំ២០២០ ស្រាប់តែលោក ក្រូច ប៊ុនគីម ជាមន្ត្រីយោធារូបនេះ បានឲ្យកូនរបស់គេយកគ្រឿងចក្រមកភ្ជួររំលោភយក បើទោះបីលោកបានរៀបរាប់ហើយយកឯកសារផ្សេងៗ រួមនឹងសលាកបត្រលេខសូន្យ១ មកបង្ហាញលោក ក្រូច ប៊ុនគីម ក៏លោក ក្រូច ប៊ុនគីម មិនខ្ចីយកភ្នែកមើលនោះដែរ ។
ពាក់ព័ន្ធករណីនេះ លោក ហេង សុឃី ក៏បានដាក់ពាក្យប្តឹងទៅអាជ្ញាធរភូមិឃុំជាច្រើនលើកច្រើនសារ តែលោក ក្រូច ប៊ុនគីម បានត្រឹមឆ្លើយថា លោកមិនឲ្យជាដាច់ខាត ។ ប្រជាពលរដ្ឋលោក ហេង សុឃី ក៏បានដាក់ពាក្យប្តឹងចូលទៅកាន់សាលាស្រុកគូលែនផងដែរ តែលោក ក្រូច ប៊ុនគីម មិនបានចូលខ្លួនដោះស្រាយនោះទេ គឺឲ្យប្រពន្ធរបស់ខ្លួនចូលមកដោះស្រាយជំនួស តែបើករណីលោក ក្រូច ប៊ុនគីម ចូលដោះស្រាយ គឺនិយាយមួយម៉ាត់ពីរម៉ាត់ក៏ដើរចេញពីមុខអាជ្ញាធរតែម្តង មិនតែប៉ុណ្ណោះ កាលពីថ្ងៃទី៨ ខែឩសភា ឆ្នាំ២០២៤ កន្លងទៅថ្មីៗនេះ ប្រជាពលរដ្ឋលោក ហេង សុឃី ថាខ្លួនបានយកត្រាក់ទ័រទៅភ្ជួរដីរបស់ខ្លួនខាងលើ ស្រាប់តែយប់ឡើងថ្ងៃខែឆ្នាំដដែលក៏ឈ្មោះ ក្រូច ប៊ុនគីម នាំបក្ខពួកកូនចៅរបស់ខ្លួនទៅដាំដំឡូងមីទាំងយប់ហ្នឹងតែម្តង។
ក្រុមប្រជាពលរដ្ឋទាំងនោះ បានបន្ដទៀតថា ចំពោះពួកគាត់ដែលមានដី អាស្រ័យផល នៅក្នុងតំបន់ខាងលើ គឺគាត់មានការព្រួយបារម្ភ នៅពេលដែលពួកគាត់ភ្ជួរដំាដំណាំគឺលោក ក្រូច ប៊ុនគីមតែងហាមប្រាមមកលើពួកគាត់ជានិច្ច តែពួកគាត់លើកឡើងថា ចុះហេតុអី្វបានជាលោក ក្រូច ប៊ុនគីម មានសិទ្ធិអាចយកគ្រឿងចក្រប្រភេទត្រាក់ទ័រឈូស ឆាយដីព្រៃសហគមន៍ ស្ថិតនៅចំណុចខាងលើ ក្លាយទៅជាវាលរហោស្ថានយកមកធ្វើជាកម្មសិទ្ធិផ្ទាល់ខ្លួន បានយ៉ាងស្រួលគ្មានការទប់ស្កាត់ ឬបង្ក្រាបពីមន្ដ្រីពាក់ព័ន្ធនោះទេ ។ ដូច្នេះប្រជាពលរដ្ឋទទូចស្នើសុំ ដល់អង្គភាពយោធភូមិភាគទី៤ ដែលមានឯកឧត្ដម ឧត្ដមសេនីយ៍ឯក ពៅ ហេង មេបញ្ជាការ យោធភូមិភាគទី៤ និងឯកឧត្តម គីម រិទ្ធី អភិបាលខេត្តព្រះវិហារ ជួយរកយុត្តិធម៌និងរកដំណោះស្រាយជូនពួកគាត់ផង ព្រោះពួកគាត់ប្រជាពលរដ្ឋស្លូតត្រង់ គ្មានសិទ្ធិអំណាចអ្វីទៅតតាំងជាមួយមន្ត្រីយោធាពាក់សក្តិ៣ លោក ក្រូច ប៊ុនគីម ដែលបានប្រើប្រាស់អំណាចមករំលោភបំពានយកដីរបស់ពួកគាត់ ទាំងដែលដីរបស់ពួកគាត់មានសលាកបត្រ ។
ជុំវិញការចោទប្រកាន់ពីសំណាក់បងប្អូនប្រជាពលរដ្ឋ អ្នកសាព័ត៌មានយើង មិនអាចសុំការបំភ្លឺពីលោក ក្រូច ប៊ុនគីមបានទេ នៅរសៀលថ្ងៃទី១៩ខែឩសភា ឆ្នាំ២០២៤នេះ ដោយគ្មានលេខទូរស័ព្ទទំនាក់ទំនងទៅលោក
ជុំវិញនឹងករណីនេះលោក ប៉ែន ជឹង អភិបាលស្រុកគូលែន បានប្រាប់តាមទូរស័ព្ទថា រឿងនេះ ដូចលោក ហេង សុឃី ភាគីវិវាទក៏ដូចប្រជាពលរដ្ឋលើកឡើងយ៉ាងអញ្ចឹង ក្រោយពីទទួលបានពាក្យបណ្តឹងពីប្រជាពលរដ្ឋហើយ លោកក៏បានកោះហៅលោក ក្រូច ប៊ុនគីម ដើម្បីដោះស្រាយ តែការកោះហៅរបស់លោកទៅលោក ក្រូច ប៊ុនគីម គឺ ចូលមកបានតែ១ដង ក្នុងការកោះហៅចំនួន ៥ដងកន្លងមក។ លោកអភិបាលស្រុក បន្តទៀតថា ក្នុងការដែលលោក ក្រូច ប៊ុនគីម ចូលមកហ្នឹងទៀតសោត នៅពេលអាជ្ញាធរសួរនាំចំ ចំណុច លោក ក្រូច ប៊ុនគីម ដើរចេញពីអង្គជំនុំជម្រះតែម្តង ដោយបញ្ចេញអាកប្បកិរិយាក្រអឺតក្រទមដាក់អាជ្ញាធរទៀតផង៕
